ಏಸಿ ಕಾರ್ ನೋ ಹ್ಯಾಂಡ್ ಸಿಗ್ನಲ್

ರಾಜಕಾರಣಿಗಳ ಹೇಳಿಕೆಗಳನ್ನು ಇಟ್ಟುಕೊಂಡು ಈ ವಾರದ ಅಂಕಣ ಬರೆಯುವುದು ಸುಲಭ. ಆಯಾ ವಾರದ ವಿದ್ಯಮಾನಗಳನ್ನು ಇಟ್ಟುಕೊಂಡು ವಿಶ್ಲೇಷಣೆ ಬರೆಯುವುದು ಸಹ ಕಷ್ಟವಲ್ಲ. ಅನೇಕರು ಅದನ್ನೇ ಮಾಡುತ್ತಾರೆ. ಇವೇ ಅಂಕಣ ಬರಹಗಳು ಎಂದು ಕರೆಯಿಸಿಕೊ೦ಡು ಬಿಟ್ಟಿವೆ. ಹೀಗಾಗಿ ಅಂಕಣ ಬರಹಗಳಿಗೆ ಸಿಗಬೇಕಾದ ಮಾನ್ಯತೆ, ಸಾಹಿತ್ಯಕ ಗಾ೦ಭೀರ್ಯ ಮತ್ತು ಸ್ಥಾನಮಾನ ಸಿಕ್ಕಿಲ್ಲ. ಇಂಥ ಬರಹಗಳ ತಾಳಿಕೆ-ಬಾಳಿಕೆ ಸಹ ಕಡಿಮೆ. ಎರಡು ವಾರಗಳ ಬಳಿಕ, ಈ ಅಂಕಣಗಳು ಅಪ್ರಸ್ತುತ. ಕನ್ನಡದ ಹಿರಿಯ ಪತ್ರಕರ್ತರೊಬ್ಬರು ಕಳೆದ ನಲವತ್ತು ವರ್ಷಗಳಿಂದ ವಾರಕ್ಕೆ ಎರಡರ೦ತೆ ಅ೦ಕಣ ಬರೆದಿದ್ದಾರೆ. ಅವರು ಬರೆದ ಅಂಕಣಗಳನ್ನೆಲ್ಲ ಸೇರಿಸಿ ಒಂದು ಪುಸ್ತಕವನ್ನಾದರೂ ಮಾಡೋಣ ಅಂದ್ರೆ ಸಾಧ್ಯವಾಗಲಿಕ್ಕಿಲ್ಲ. ಕಾರಣ ಅವರು ಬರೆದಿದ್ದು ಆ ವಾರಕ್ಕೇ ರದ್ದಿ. ನನ್ನ ದೃಷ್ಟಿಯಲ್ಲಿ ಅಂಕಣ ಬರಹಗಳೆಂದರೆ ಪಿಂಗಾಣಿ ಭರಣಿಯಲ್ಲಿಟ್ಟ ಉಪ್ಪಿನಕಾಯಿಯ೦ತೆ, ಮಡಿಕೆಯೊಳಗಿಟ್ಟ ಜೋನಿ ಬೆಲ್ಲದಂತೆ, ಜೇನುತುಪ್ಪದಂತೆ. ಎಷ್ಟೇ ವರ್ಷ ಇಟ್ಟರೂ ಕೆಡಬಾರದು. ರುಚಿ, ಸ್ವಾದ ಕಳೆದುಕೊಳ್ಳಬಾರದು. ಹಾಗೇ ಅಂಕಣಗಳೂ, ಹತ್ತು ವರ್ಷಗಳ ನಂತರವೂ ಅವು ಪ್ರಸ್ತುತವೆನಿಸಬೇಕು. ಯಾವುದೋ ಹಳೆಯ ತುಣುಕೊಂದನ್ನು ಓದುತ್ತಿದ್ದೇನೆ ಎಂದು ಅನಿಸಬಾರದು. ಕತ್ತರಿಸಿಟ್ಟ ಅಂಕಣಗಳ ಬಣ್ಣ ಬದಲಾದರೂ, ಗುಣ ಮಾತ್ರ ಬದಲಾಗಬಾರದು. ಇಲ್ಲಿನ ಬರಹಗಳೂ ಹಾಗೆ.