ಈ ಪುಸ್ತಕವು ಏಕಕಾಲದಲ್ಲಿ ಮಾರಣಾಂತಿಕ ಖಾಯಿಲೆಯ ಎದುರಲ್ಲೂ ಮನೋಸ್ಥೈರ್ಯವನ್ನು ಉಳಿಸಿಕೊಳ್ಳಲು ಹೋರಾಡಿದ ಮಹಿಳೆಯ ಕಥೆಯಾಗುವುದರ ಜೊತೆಗೆ, ಕ್ಯಾನ್ಸರ್‌ ಬಂದಾಗ ಸುತ್ತಲಿನವರು ಏನು ಮಾಡಬೇಕು, ಹೇಗೆ ಸಿದ್ಧವಾಗಿರಬೇಕು, ಯಾವ್ಯಾವ ಎಚ್ಚರಿಕೆಗಳನ್ನು ತೆಗೆದುಕೊಳ್ಳಬೇಕು, ನೆರವು ಸಹಾಯ ಒದಗಿಸುವ ಆಸ್ಪತ್ರೆಗಳು, ವಿಮಾ ಯೋಜನೆಗಳು ಎಲ್ಲದರ ಬಗ್ಗೆಯೂ ಮಾತನಾಡುತ್ತದೆ. ಈ ಮಾಹಿತಿ ಆನ್‌ಲೈನ್‌ನಲ್ಲಿ ಸಿಗಬಹುದು, ಆದರೆ ಅದು ಎಷ್ಟರಮಟ್ಟಿಗೆ ಜನಸ್ನೇಹಿ ಮತ್ತು ಕನ್ನಡಸ್ನೇಹಿಯಾಗಿರುತ್ತದೆ ಎನ್ನುವುದು ಪ್ರಶ್ನೆ. ಎಲ್ಲ ಮಾಹಿತಿಗಳನ್ನೂ ಸರಳ ಕನ್ನಡದಲ್ಲಿ ಒದಗಿಸುವ ಈ ಪುಸ್ತಕ ಏಕಕಾಲಕ್ಕೆ ಸೃಜನಶೀಲ ಕೃತಿಯೂ ಮತ್ತು ಮಾಹಿತಿಪೂರ್ಣ ಪುಸ್ತಕವೂ ಆಗಿದೆ. ಅದು ಈ ಪುಸ್ತಕದ ಹಿರಿಮೆ. ಇದನ್ನು ಬರೆದ ಸಂಯುಕ್ತಳಿಗೆ ಅಭಿನಂದನೆಗಳನ್ನು ಹೇಳುತ್ತಲೇ ಕಥಾನಾಯಕಿ ವಿಜಯಾ ಅವರ ಅದಮ್ಯ ಜೀವನಪ್ರೀತಿಗೆ ಶರಣು.

- ಸಂಧ್ಯಾರಾಣಿ ಎನ್‌ । ಲೇಖಕಿ

ಕ್ಯಾನ್ಸರ್‌ ಯೋಧಯೋಧೆಯರ ಕುರಿತು ಬಂದಿರುವ ಹಲವಾರು ಬೆಸ್‌್ಟ ಸೆಲ್ಲರ್‌ಗಳ ಮಧ್ಯೆ ಈ ಪುಸ್ತಕ ಮಸ್ಟ್ ಬೈ ಆಗುತ್ತದೆ ಎನಿಸಿತು. ಕ್ಯಾನ್ಸರ್‌ ರೋಗದ ಕುರಿತು ಮತ್ತು ಕ್ಯಾನ್ಸರ್‌ ಬಂದಿರುವಾಗ ಅದನ್ನು ಅನುಭವಿಸುವುದರ ಕುರಿತು ಬಹಳ ವಸ್ತುನಿಷ್ಠ ನಿರೂಪಣೆ ಇಲ್ಲಿದೆ. ಇದು ಡಾಕ್ಯುಮೆಂಟರಿ ಅಲ್ಲ, ಮನಸ್ಸನ್ನು ತಟ್ಟುವ, ಆ ಮೂಲಕ ಬರಿದೆ ಸಂವೇದನೆಯಲ್ಲಿ ನಿಲ್ಲದೆ ನಮ್ಮನ್ನೂ ಯೋಚನೆ, ಕಾರ್ಯಕ್ಕೆ ಹಚ್ಚುವ ಕಥನಾಂಶ ಈ ಪುಸ್ತಕದಲ್ಲಿದೆ. ಅನುಪಮಾ ನಿರಂಜನ ಬರೆದದ್ದಿರೆ ಹೇಗಿರುತ್ತಿತ್ತೋ ಹಾಗಿದೆ ಅನ್ನಿಸಿತು. ವಿಷಯವನ್ನು ಅರ್ಥಪೂರ್ಣವಾಗಿ, ಆದರೂ ವರದಿಯಾಗಿಬಿಡದ ಹಾಗೆ, ಮನಮುಟ್ಟುವ ಕಥೆಯಾಗಿ ಬರೆಯುವ ಸವಾಲಿನಲ್ಲಿ ಲೇಖಕಿ ಗೆದ್ದಿದ್ದಾರೆ. ಅಭಿನಂದನೆಗಳು.

- ಸಿಂಧು ರಾವ್‌ ಟಿ । ಲೇಖಕಿ