ತಿಳಿ ಹಾಸ್ಯದೊಂದಿಗೆ ತುಂಟತನದ ಸ್ವಾರಸ್ಯಗಳನ್ನೂ ಚುಟುಕುಗಳಲ್ಲಿ ಕುಟುಕುಗಳಂತೆ ಕಟ್ಟಿಕೊಟ್ಟಿರುವುದರಿಂದ ಇದು ರಸಗುಲ್ಲವಷ್ಟೇ ಅಲ್ಲ.
ರಸಬೆಲ್ಲವಾಗಿಯೂ ಸಿಹಿ ಹೆಚ್ಚಿಸಿದೆ. ಅಲ್ಲಲ್ಲಿ ಜೀವನದ ಚೊಗರು ಚೋದ್ಯಗಳಿಗೆ ಒಗ್ಗರಣೆಯೊಂದಿಗೆ ನಿಂಬೆರಸ ಹಾಕಿರುವುದರಿಂದ ರಸಗುಲ್ಲದಲ್ಲಿ ನವರಸಗಳಿರುವಂತಾಗಿದೆ.
ನಗು-ಲಘು ಶೈಲಿಯ ಬರಹಗಳಲ್ಲಿ ರುಚಿ ಹೆಚ್ಚಿಸಲು ಹೋಗಿ ಅಭಿವ್ಯಕ್ತಿಯಲ್ಲಿ ಸದಭಿರುಚಿ ಮರೆಯುವ ಅಪಾಯಗಳಾಗುತ್ತವೆ. ಆದರೆ ಅಡಕಳ್ಳಿಯವರು ರುಚಿ ಅಭಿರುಚಿಗಳ ಸಮಚಿತ್ತ ಕಾಯ್ದುಕೊಂಡಿದ್ದಾರೆ. ಹಾಸ್ಯದ ಹೋಳಿಗೆಯಲ್ಲಿ ಬದುಕಿನ ಗಂಭೀರ ಒಳನೋಟದ ಹೂರಣವನ್ನೂ ತುಂಬಿಕೊಟ್ಟಿರುವ, ಈ ಕೃತಿಯನ್ನು ಓದುತ್ತಾ ಈ ಪುಸ್ತಕಾಂಗಣದ ವಿಹಂಗಮದಲ್ಲಿ ವಿಹರಿಸಬಹುದು.
ಆಸ್ತಿ, ಅಂತಸ್ತು, ಹಣ ಮನುಷ್ಯನಲ್ಲಿದ್ದರೂ ಆತನಲ್ಲಿ ನಗುವೇ ಕೊರತೆಯಾದರೆ ಬಾಳು ವ್ಯರ್ಥವಂತೆ. ಮನಸ್ಸನ್ನು ಮುದಗೊಳಿಸಿಕೊಳ್ಳಲು.
ಹದಗೊಳಿಸಿಕೊಳ್ಳಲು ಈ 'ರಸಗುಲ್ಲಾ'ದ ಮೂಲಕ ಸಾಧ್ಯವಾಗುವುದಾದರೆ ನೀವೂ ಯಾಕೆ ಈ ಪುಸ್ತಕವನ್ನು ಕೈಗೆತ್ತಿಕೊಳ್ಳಬಾರದು?
ಡಾ. ಜಯಮಾಲಾ ರಾಮಚಂದ್ರ