ಸಿದ್ದಗಂಗಪ್ಪನವರು ಒಂದು ರೀತಿಯಲ್ಲಿ ಶಬ್ದಲೇಖಕರಲ್ಲ; ನಿಶ್ಯಬ್ದ ಲೇಖಕರು. ಅವರದು ಶಬ್ದ ಸಂಭ್ರಮವಿಲ್ಲದ ಸರಳ ಬರವಣಿಗೆ ಸ್ನಾತಕೋತ್ತರ ಪದವೀಧರರಾದರೂ, ಅವರು ಹೆಚ್ಚು ಪ್ರಭಾವಿತರಾಗಿರುವುದು ಗ್ರಂಥಾಧ್ಯಯನದಷ್ಟೇ ಪೂಜ್ಯಶ್ರೀ ಶಿವಕುಮಾರ ಸ್ವಾಮಿಗಳ ದಿವ್ಯಕೃಪೆಯಿಂದ, ಪೂಜ್ಯರನ್ನು ಕುರಿತ ಅವರ ಬರಹದ ಪ್ರತಿಯೊಂದು ಶಬ್ದದಲ್ಲೂ ಈ ಭಾವ ತುಂಬಿಕೊಂಡಿರುವುದು ಕಂಡುಬರುತ್ತದೆ. ಸಿದ್ದಗಂಗಾ ಕ್ಷೇತ್ರದ ಬಗೆಗೆ ಅವರ ಮಾತೊಂದು ಹೀಗಿದೆ: "ಅನಾಥವಾಗಿ ಬಿದ್ದ ಕಲ್ಲುಗಳನ್ನು ಕಡೆದು, ಕಲಾತ್ಮಕ ಮೂರ್ತಿಗಳನ್ನಾಗಿ ರೂಪಿಸಿ, ಲೋಕಮನ್ನಣೆ ಪಡೆಯುವಂತೆ ಮಾಡುವ ಮಹಾಶಿಲ್ಪಕಲಾ ಕೇಂದ್ರ-ಸಿದ್ಧಗಂಗಾ."
ಸಿದ್ದಗಂಗಪ್ಪನವರಲ್ಲಿ ನಾನು ಕಂಡಿರುವ ಗಮನಾರ್ಹ ಗುಣಗಳೆಂದರೆ, ಸಾಹಿತ್ಯ ಶ್ರೀಮಂತಿಕೆ, ಚಾರಿತ್ರಿಕ ಪರಂಪರೆ ಮತ್ತು ಸಾಂಸ್ಕೃತಿಕ ಸೌಂದರ್ಯಗಳನ್ನು ಜನಮನಕ್ಕೆ ಮುಟ್ಟಿಸುವ ಬಗೆಗೆ ಅವರಿಗಿರುವ ಶ್ರದ್ಧಾಸಕ್ತಿ ಮತ್ತು ಸಮರ್ಪಿತ ದುಡಿಮೆ. ಅವರು ಸಾಹಿತ್ಯದ ಬೆಳಕಿನಲ್ಲಿ ತಮ್ಮ ಬದುಕನ್ನು, ಆ ಬದುಕಿನ ಬೆಳಕಿನಲ್ಲಿ ತಮ್ಮನ್ನು ತಾವೇ ರೂಪಿಸಿಕೊಂಡಿರುವ ಪ್ರಯತ್ನಶೀಲ ವ್ಯಕ್ತಿ. ಸತತ ಚಿಂತನೆ, ಅಧ್ಯಯನ, ಬರಹಗಳ ಹೊರತಾಗಿ ಬೇರಾವ ಕಡೆಗೂ ಮನ ಹರಿಯಬಿಡದ ಆತ್ಮಸಂಯಮಿ ಸಿದ್ದಗಂಗಪ್ಪ ಅವರು.